มีเท้าเปื้อนห้ามเหยียบเสนาสนะ

จกฺกลีติ กมฺพลาทีหิ เวเฐตฺวา กตจกฺกลิกํ ฯ

อลฺเลหิ ปาเทหีติ เยหิ อกฺกนฺตฏฺฐาเน อุทกํ ปญฺญายติ เอวรูเปหิ ปาเทหิ ปริภณฺฑกตา ภูมิ วา เสนาสนํ วา อนกฺกมิตพฺพํ ฯ สเจ ปน อุทกสิเนหมตฺตเมว ปญฺญายติ น อุทกํ วฏฺฏติ ฯ ปาทปุญฺฉนึ อปน ลฺลปาเทหิปิ อกฺกมิตุํ วฏฺฏติเยว ฯ สอุปาหเนน โธตปาเทหิ อกฺกมิตพฺพฏฺฐาเนเยว น วฏฺฏติ ฯ

โจฬเกน ปลิเวเฐตุนฺติ สุธาภูมิยํ วา ปริภณฺฑภูมิยํ วา สเจ ตฏฺฏิกา วา กฏสารโก วา นตฺถิ โจฬเกน ปาทา เวเฐตพฺพา ฯ ตสฺมึ อสติ ปณฺณํปิ อตฺถริตุํ วฏฺฏติ กิญฺจิ อนตฺถริตฺวา ฐเปนฺตสฺส ปน ทุกฺกฏํ ฯ ยทิ ปน ตตฺถ เนวาสิกา อตฺถตายปิ ภูมิยา ฐเปนฺติ อโธตปาเทหิ วลญฺเชนฺติ ตเถว วลญฺเชตุํ วฏฺฏติ ฯ

น ภิกฺขเว ปริกมฺมกตา ภิตฺตีติ เสตภิตฺติ วา จิตฺตกมฺมกตา วา น เกวลญฺจ ภิตฺตึเยว ทฺวารํปิ วาตปานํปิ อปสฺเสนผลกํปิ ปาสาณตฺถมฺภํปิ รุกฺขตฺถมฺภํปิ จีวเรน วา เกนจิ วา อปฺปฏิจฺฉาเทตฺวา อปสฺสยิตุํ น ลภติเยว ฯ

โธตปาทกาติ โธตปาทกา หุตฺวา โธเตหิ ปาเทหิ อกฺกมิตพฺพฏฺ- ฐาเน นิปชฺชิตุํ กุกฺกุจฺจายนฺติ ฯ โธตปาทเกติปิ ปาโฐ ฯ โธเตหิ ปาเทหิ อกฺกมิตพฺพฏฺฐานสฺเสตํ อธิวจนํ ฯ ปจฺจตฺถริตฺวาติ ปริภณฺฑกตภูมึ วา ภุมฺมตฺถรณเสนาสนํ วา สงฺฆิกํ มญฺจปีฐํ วา อตฺตโน สนฺตเกน ปจฺจตฺถรเณน ปจฺจตฺถริตฺวาว นิปชฺชิตพฺพํ ฯ สเจ นิทฺทายโตปิ ปจฺจตฺถรเณ สงฺกุฏิเก โกจิ สรีราวยโว มญฺจํ วา ปีฐํ วา ผุสติ อาปตฺติเยว ฯ โลเมสุ ปน โลมคณนาย อาปตฺติโย ฯ ปริโภคสีเสน อปสฺสยนฺตสฺสาปิ เอเสว นโย ฯ หตฺถตลปาทตเลหิ ปน ผุสิตุํ วา อกฺกมิตุํ วา วฏฺฏติ ฯ มญฺจปีฐํ นีหรนฺตสฺส กาเย ปฏิหญฺญติ อนาปตฺติ ฯ