มีเท้าเปื้อนห้ามเหยียบเสนาสนะ

Tena kho pana samayena bhikkhū adhotehi pādehi senāsanaṃ akkamanti . senāsanaṃ dussati . bhagavato etamatthaṃ ārocesuṃ . Na bhikkhave adhotehi pādehi senāsanaṃ akkamitabbaṃ yo akkameyya āpatti dukkaṭassāti.

Tena kho pana samayena bhikkhū allehi pādehi senāsanaṃ akkamanti . senāsanaṃ dussati . bhagavato etamatthaṃ ārocesuṃ . Na bhikkhave allehi pādehi senāsanaṃ akkamitabbaṃ yo akkameyya āpatti dukkaṭassāti.

Tena kho pana samayena bhikkhū saupāhanā senāsanaṃ akkamanti . senāsanaṃ dussati . bhagavato etamatthaṃ ārocesuṃ . Na bhikkhave saupāhanena senāsanaṃ akkamitabbaṃ yo akkameyya āpatti dukkaṭassāti.

Tena kho pana samayena bhikkhū parikammakatāya bhūmiyā nuṭṭhahanti 1- . vaṇṇo dussati . bhagavato etamatthaṃ ārocesuṃ . @Footnote: 1 Yu. nuṭṭhuhanti. Ma. niṭṭhabhanti. Na bhikkhave parikammakatāya bhūmiyā nuṭṭhahitabbaṃ 1- yo nuṭṭhaheyya 2- āpatti dukkaṭassa anujānāmi bhikkhave kheḷamallakanti.

Tena kho pana samayena mañcapādāpi pīṭhapādāpi parikammakataṃ bhūmiṃ vilikhanti . bhagavato etamatthaṃ ārocesuṃ . Anujānāmi bhikkhave coḷakena paliveṭhetunti.

Tena kho pana samayena bhikkhū parikammakataṃ bhittiṃ apassenti . vaṇṇo dussati . bhagavato etamatthaṃ ārocesuṃ . Na bhikkhave parikammakatā bhitti apassetabbā yo apasseyya āpatti dukkaṭassa anujānāmi bhikkhave apassenaphalakanti . Apassenaphalakaṃ heṭṭhato bhūmiṃ vilikhati uparito bhittiñca 3- . bhagavato etamatthaṃ ārocesuṃ . anujānāmi bhikkhave heṭṭhato ca uparito ca coḷakena paliveṭhetunti.

Tena kho pana samayena bhikkhū dhotapādakā nipajjituṃ kukkuccāyanti . bhagavato etamatthaṃ ārocesuṃ . anujānāmi bhikkhave paccattharitvā nipajjitunti.