๘. อนุเลปทายกเถราปทาน (๓๐๘)

|310.39| Atthadassissa munino addasaṃ sāvakaṃ ahaṃ navakammaṃ karontassa sīmāya upagañchahaṃ. |310.40| Niṭṭhite navakamme ca anulepaṃ adāsahaṃ pasannacitto sumano puññakkhette anuttare. |310.41| Aṭṭhārase kappasate yaṃ kammamakariṃ tadā duggatiṃ nābhijānāmi anulepassidaṃ phalaṃ. |310.42| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā anulepadāyako thero imā gāthāyo abhāsitthāti. Anulepadāyakattherassa apadānaṃ samattaṃ.