ปาณาติปาตสูตร

๘. ทุติยอามกธญฺญเปยฺยาลวคฺค

๘. พีชคามสุตฺตวณฺณนา

พีชคามภูตคามสมารมฺภาติ มูลพีชํ ขนฺธพีชํ ผลุพีชํ อคฺคพีชํ พีชพีชนฺติ ปญฺจวิธสฺส พีชคามสฺส เจว ยสฺส กสฺสจิ นีลติณรุกฺขาทิกสฺส ภูตคามสฺส จ สมารมฺภา, เฉทนปจนาทิภาเวน วิโกปนา ปฏิวิรตาติ อตฺโถ.

๙. วิกาลโภชนสุตฺตวณฺณนา

วิกาลโภชนาติ กาลาติกฺกนฺตโภชนา, มชฺฌนฺติกาติกฺกมโต ปฏฺฐาย ยาวกาลิกปริโภคาติ อตฺโถ.

๑๐. คนฺธวิเลปนสุตฺตวณฺณนา

มาลาทีสุ มาลาติ ยงฺกิญฺจิ ปุปฺผํ. คนฺธนฺติ ยงฺกิญฺจิ คนฺธชาตํ, ๑- วิเลปนนฺติ ฉวิราคกรณํ. ตตฺถ ปิลนฺธนฺตา ธาเรนฺติ นาม, อูนฏฺฐานํ ปูเรนฺตา มณฺเฑนฺติ นาม, คนฺธวเสน ฉวิราควเสน จ สาทิยนฺตา วิภูเสนฺติ นาม, ฐานํ วุจฺจติ การณํ. ตสฺมา ยาย ทุสฺสีลฺยเจตนาย ตานิ มาลาธารณาทีนิ มหาชโน กโรติ, ตโต ปฏิวิรตาติ อตฺโถ.