๘. สหัสสวรรค

|18.100| 8 Sahassamapi ce vācā anatthapadasañhitā ekaṃ atthapadaṃ seyyo yaṃ sutvā upasammati. |18.101| Sahassamapi ce gāthā anatthapadasañhitā ekaṃ gāthāpadaṃ seyyo yaṃ sutvā upasammati. |18.102| Yo ca gāthāsataṃ bhāse anatthapadasañhitā ekaṃ dhammapadaṃ seyyo yaṃ sutvā upasammati. |18.103| Yo sahassaṃ sahassena saṅgāme mānuse jine ekañca jeyyamattānaṃ sa ve saṅgāmajuttamo. |18.104| Attā have jitaṃ seyyo yā cāyaṃ itarā pajā attadantassa posassa niccaṃ saññatacārino |18.105| neva devo na gandhabbo na māro saha brahmunā jitaṃ apajitaṃ kayirā tathārūpassa jantuno. |18.106| Māse māse sahassena yo yajetha sataṃ samaṃ ekañca bhāvitattānaṃ muhuttamapi pūjaye sā yeva pūjanā seyyo yañce vassasataṃ hutaṃ. |18.107| Yo ca vassasataṃ jantu aggiṃ paricare vane ekañca bhāvitattānaṃ muhuttamapi pūjaye sā yeva pūjanā seyyo yañce vassasataṃ hutaṃ. |18.108| Yaṅkiñci yiṭṭhaṃ va hutaṃ va loke saṃvaccharaṃ yajetha puññapekkho sabbaṃpi taṃ na catubhāgameti abhivādanā ujugatesu seyyo. |18.109| Abhivādanasīlissa niccaṃ vuḍḍhāpacāyino cattāro dhammā vaḍḍhanti āyu vaṇṇo sukhaṃ balaṃ. |18.110| Yo ca vassasataṃ jīve dussīlo asamāhito ekāhaṃ jīvitaṃ seyyo sīlavantassa jhāyino. |18.111| Yo ca vassasataṃ jīve duppañño asamāhito ekāhaṃ jīvitaṃ seyyo paññavantassa jhāyino. |18.112| Yo ca vassasataṃ jīve kusīto hīnavīriyo ekāhaṃ jīvitaṃ seyyo viriyaṃ ārabhato daḷhaṃ. |18.113| Yo ca vassasataṃ jīve apassaṃ udayabbayaṃ ekāhaṃ jīvitaṃ seyyo passato udayabbayaṃ. |18.114| Yo ca vassasataṃ jīve apassaṃ amataṃ padaṃ ekāhaṃ jīvitaṃ seyyo passato amataṃ padaṃ. |18.115| Yo ca vassasataṃ jīve apassaṃ dhammamuttamaṃ ekāhaṃ jīvitaṃ seyyo passato dhammamuttamaṃ. Sahassavaggo aṭṭhamo. ----------