๑๕. หาริตเถรคาถา

321. 15. Hāritattheragāthāvaṇṇanā

yo pubbe karaṇīyānīti āyasmato hāritattherassa gāthā. Kā uppatti?

ayampi padumuttarassa bhagavato kāle kulagehe nibbattitvā viññutaṃ patto satthari parinibbute tassa citakapūjāya kayiramānāya gandhena pūjaṃ akāsi. So tena puññakammena devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbattitvā hāritoti laddhanāmo vayappatto jātimānaṃ nissāya aññe vasalavādena samudācarati. So bhikkhūnaṃ santikaṃ gantvā dhammaṃ sutvā paṭiladdhasaddho pabbajitopi ciraparicitattā vasalasamudācāraṃ na vissajji. Athekadivasaṃ satthu santike dhammaṃ sutvā sañjātasaṃvego vipassanaṃ paṭṭhapetvā attano cittappavattiṃ upaparikkhanto mānuddhaccaviggahitacittaṃ 1- disvā taṃ pahāya vipassanaṃ ussukkāpetvā arahattaṃ pāpuṇi. Tena vuttaṃ apadāne 2- :-

"citāsu kurumānāsu 3- nānāgandhe samāhaṭe

pasannacitto sumano gandhamuṭṭhimapūjayiṃ.

Satasahasse ito 4- kappe citakaṃ yamapūjayiṃ

duggatiṃ nābhijānāmi citapūjāyidaṃ phalaṃ.

Kilesā jhāpitā mayhaṃ .pe. kataṃ buddhassa sāsanan"ti.

Arahā pana hutvā vimuttisukhaṃ anubhavanto:-

"yo pubbe karaṇīyāni pacchā so kātumicchati

sukhā so dhaṃsate ṭhānā pacchā ca manutappati.

@Footnote: 1 cha.Ma. mānuddhaccaviggahitataṃ 2 khu.apa. 33/50/75 gandhapūjakattherāpadāna (syā)

@3 pāli. citakesu kurumānesu 4 cha.Ma. satasahassito

Yañhi kayirā tañhi vade yaṃ na kayirā na taṃ vade

akarontaṃ bhāsamānaṃ parijānanti paṇḍitā.

Susukhaṃ vata nibbānaṃ sammāsambuddhadesitaṃ

asokaṃ virajaṃ khemaṃ yattha dukkhaṃ nirajujhatī"ti tīhi gāthāhi bhikkhūnaṃ ovādadānamukhena aññaṃ byākāsi. Tāsaṃ attho heṭṭhā vuttoyeva.

Hāritattheragāthāvaṇṇanā niṭṭhitā.