๓. ปัลลังกวิมาน

|31.291| 3 Pallaṅkaseṭṭhe maṇisovaṇṇacitte pupphābhikiṇṇe sayane uḷāre tatthacchasi devi mahānubhāve uccāvacā iddhivikubbamānā |31.292| imā ca te accharāyo samantato Naccanti gāyanti pamodayanti deviddhipattāsi mahānubhāve manussabhūtā kimakāsi puññaṃ kenāsi evañjalitānubhāvā vaṇṇo ca te sabbadisā pabhāsatīta. |31.293| Ahaṃ manussesu manussabhūtā aḍḍhe kule suṇisā ahosiṃ akkodhanā bhattu vasānuvattinī appamattā uposathe |31.294| manussabhūtā daharā apāpikā pasannacittā patimābhirādhayiṃ divā ca ratto ca manāpacārinī ahaṃ pure sīlavatī ahosiṃ |31.295| pāṇātipātā viratā acoriyā saṃsuddhakāyā sucibrahmacārinī amajjapānā ca musā abhāṇī sikkhāpadesu paripūrakārinī |31.296| cātuddasiṃ pañcadasiṃ yā ca pakkhassa aṭṭhamī pāṭihāriyapakkhañca pasannamānasā ahaṃ |31.297| aṭṭhaṅgupetaṃ anudhammacārinī Uposathaṃ pītimanā upāvasiṃ imañca ariyaṃ aṭṭhaṅgavarehupetaṃ samādayitvā kusalaṃ sukhudrayaṃ patimhi kalyāṇavasānuvattinī ahosiṃ pubbe sugatassa sāvikā |31.298| etādisaṃ kusalaṃ jīvaloke kammaṃ karitvāna visesabhāginī kāyassa bhedā abhisamparāyaṃ deviddhipattā sugatimhi āgatā |31.299| vimānapāsādavare manorame parivāritā accharāsaṅgaṇena sayampabhā devagaṇā ramanti maṃ dīghāyukiṃ devavimānamāgatanti. Pallaṅkavimānaṃ tatiyaṃ.