๓. อุปจาลาเถรีคาถา

[๔๖๑] |๔๖๑.๑๘๙| ๓ สตีมตี จกฺขุมตี ภิกฺขุนี ภาวิตินฺทฺริยา ปฏิวิชฺฌึ ปทํ สนฺตํ อกาปุริสเสวิตํ ฯ |๔๖๑.๑๙๐| กึ นุ ชาตึ น โรเจสิ ชาโต กามานิ ภุญฺชติ ภุญฺชาหิ กามรติโย มาหุ ปจฺฉานุตาปินี ฯ |๔๖๑.๑๙๑| ชาตสฺส มรณํ โหติ หตฺถปาทาน เฉทนํ วธพนฺธปริกฺเขปํ ๑- ชาโต ทุกฺขํ นิคจฺฉติ ฯ |๔๖๑.๑๙๒| อตฺถิ สกฺยกุเล ชาโต สมฺพุทฺโธ อปราชิโต โส เม ธมฺมมเทเสสิ ชาติยา สมติกฺกมํ |๔๖๑.๑๙๓| ทุกฺขํ ทุกฺขสมุปฺปาทํ ทุกฺขสฺส จ อติกฺกมํ อริยฏฺฐงฺคิกํ มคฺคํ ทุกฺขูปสมคามินํ ฯ |๔๖๑.๑๙๔| ตสฺสาหํ วจนํ สุตฺวา วิหรึ สาสเน รตา ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๔๖๑.๑๙๕| สพฺพตฺถ วิหตา นนฺทิ ตโมกฺขนฺโธ ปทาลิโต เอวํ ชานาหิ ปาปิม นิหโต ตฺวมสิ อนฺตก ฯ อุปจาลา ฯ สตฺตกนิปาโต สมตฺโต ฯ ----------------- @เชิงอรรถ: ๑ ยุ. วธพนฺธปริเกฺลสํ ฯ