๓. อุปจาลาเถรีคาถา

TIPITAKA Volume 26 : PALI ROMAN Sutta Pitaka Vol 18 : Sutta. Khu. vimāna-petavatthu thera-therīgāthā

[461] |461.189| 3 Satīmatī cakkhumatī bhikkhunī bhāvitindriyā paṭivijjhiṃ padaṃ santaṃ akāpurisasevitaṃ. |461.190| Kiṃ nu jātiṃ na rocesi jāto kāmāni bhuñjati bhuñjāhi kāmaratiyo māhu pacchānutāpinī. |461.191| Jātassa maraṇaṃ hoti hatthapādāna chedanaṃ vadhabandhaparikkhepaṃ 1- jāto dukkhaṃ nigacchati. |461.192| Atthi sakyakule jāto sambuddho aparājito so me dhammamadesesi jātiyā samatikkamaṃ |461.193| dukkhaṃ dukkhasamuppādaṃ dukkhassa ca atikkamaṃ ariyaṭṭhaṅgikaṃ maggaṃ dukkhūpasamagāminaṃ. |461.194| Tassāhaṃ vacanaṃ sutvā vihariṃ sāsane ratā tisso vijjā anuppattā kataṃ buddhassa sāsanaṃ. |461.195| Sabbattha vihatā nandi tamokkhandho padālito evaṃ jānāhi pāpima nihato tvamasi antaka. Upacālā. Sattakanipāto samatto. ----------------- @Footnote: 1 Yu. vadhabandhapariklesaṃ.