๖. มัจฉชาดก

๖ มจฺฉชาตกํ

น มายมคฺคิ ตปตีติ อิทํ สตฺถา เชตวเน วิหรนฺโต ปุราณทุติยิกปโลภนํ อารพฺภ กเถสิ ฯ

ตญฺหิ ภิกฺขุํ สตฺถา สจฺจํ กิร ตฺวํ ภิกฺขุ อุกฺกณฺฐิโตติ ปุจฺฉิตฺวา สจฺจํ ภนฺเตติ วุตฺเต เกน อุกฺกณฺฐาปิโตสีติ ปุฏฺโฐ ปุราณทุติยิกายาติ อาห ฯ อถ นํ สตฺถา อยํ เต ภิกฺขุ อิตฺถี อนตฺถการิกา, ปุพฺเพปิ ตฺวํ เอตํ นิสฺสาย สูเลน วิชฺฌิตฺวา องฺคาเรสุ ปจิตฺวา ขาทิตพฺพตํ ปตฺโต ปณฺฑิเต นิสฺสาย ชีวิตํ ลภีติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส ปุโรหิโต อโหสิ ฯ อเถกทิวสํ เกวฏฺฏา ชาเล ลคฺคํ มจฺฉํ อุทฺธริตฺวา อุณฺหวาลุกาปิฏฺเฐ ฐเปตฺวา องฺคาเรสุ นํ ปจิตฺวา ขาทิสฺสามาติ สูลํ ตจฺเฉสุํ ฯ มจฺโฉ มจฺฉึ อารพฺภ ปริเทวมาโน อิมา คาถา อโวจ

น มายมคฺคิ ตปติ น สูโล สาธุ ตจฺฉิโต,

ยญฺจ มํ มญฺญเต มจฺฉี อญฺญํ โส รติยา คโต

โส มํ ทหติ ราคคฺคิ จิตฺตญฺจูปตเปติ มํ,

ชาลิโน มุญฺจถยิรา, น กาเม หญฺญเต กฺวจีติ ฯ

ตตฺถ น มายมคฺคีติ น มํ อยํ อคฺคิ ตปติ น ตาปํ ชเนติ น โสจยตีติ อตฺโถ ฯ น สูโลติ อยํ สูโลปิ สาธุ ตจฺฉิโต มํ น ตปติ น เม โสกํ อุปฺปาเทติ ฯ ยญฺจ มํ มญฺญเต มจฺฉีติ ยํ ปน มํ มจฺฉี เอวํ มญฺญติ อญฺญํ มจฺฉึ โส ปญฺจกามคุณรติยา คโตติ ตเทว มํ ตปติ โสจยติ มํ ทหติ ฯ โส มํ ทหตีติ โย ปเนส ราคคฺคิ โส มํ ทหติ ฌาเปติ ฯ จิตฺตญฺจูปตเปติ มนฺติ ราคสมฺปยุตฺตกํ มม จิตฺตเมว มํ อุปตาเปติ กิลเมติ วิเหเฐติ ฯ ชาลิโนติ เกวฏฺเฏ อาลปติ ฯ เต หิ ชาลสฺส อตฺถิตาย ชาลิโนติ วุจฺจนฺติ ฯ มุญฺจถยิราติ ปฏิมุญฺจถ เม ๑- สามิโนติ ยาจติ ฯ น กาเม หญฺญเต กฺวจีติ กาเม ปติฏฺฐิโต กาเมน นียมาโน สตฺโต น กฺวจิ หญฺญติ ฯ น หิ ตํ ตุมฺหาทิสา หนิตุํ อนุจฺฉวิกาติ

@เชิงอรรถ: ๑ มนฺติปิ ฯ ปริเทวติ ฯ อถ วา กาเมติ เหตุวจเน ภุมฺมํ, กามเหตุ มจฺฉึ อนุพนฺธมาโน นาม กฺวจิ ตุมฺหาทิเสหิ หญฺญตีติ ปริเทวติ ฯ

ตสฺมึ ขเณ โพธิสตฺโต นทีตีรํ คโต ตสฺส มจฺฉสฺส ปริเทวิตํ สุตฺวา เกวฏฺเฏ อุปสงฺกมิตฺวา ตํ มจฺฉํ โมเจติ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน อุกฺกณฺฐิโต ภิกฺขุ โสตาปตฺติผเล ปติฏฺฐหิ ฯ ตทา มจฺฉี ปุราณทุติยิกา อโหสิ, อุกฺกณฺฐิตภิกฺขุ มจฺโฉ, ปุโรหิโต ปน อหเมวาติ ฯ

มจฺฉชาตกํ ฉฏฺฐํ ฯ

-------