๘. วิฆาสาทชาดก

วิฆาสาทชาตกํ

สุสุขํ วต ชีวนฺตีติ อิทํ สตฺถา ปุพฺพาราเม วิหรนฺโต เกฬิสีลเก ภิกฺขู อารพฺภ กเถสิ ฯ

เตสุ หิ มหาโมคฺคลฺลานตฺเถเรน ปาสาทํ กมฺเปตฺวา สํเวชิเตสุ ธมฺมสภายํ ภิกฺขู เตสํ อคุณํ กเถนฺตา นิสีทึสุ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพเปเต เกฬิสีลกาเยวาติ วตฺวา อตีตํ อาหริ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สกฺโก อโหสิ ฯ อถญฺญตรสฺมึ กาสิกคาเม สตฺต ภาตโร กาเมสุ โทสํ ทิสฺวา นิกฺขมิตฺวา อิสิปพฺพชฺชํ ปพฺพชิตฺวา มชฺฌรญฺเญ วสนฺตา โยเค โยคํ อกตฺวา กายทฬฺหิพหุลา หุตฺวา นานปฺปการํ กีฬํ กีฬนฺตา จรึสุ ฯ สกฺโก เทวราชา อิเม สํเวเชสฺสามีติ สุโก หุตฺวา เตสํ วสนฏฺฐานํ อาคนฺตฺวา เอกสฺมึ รุกฺเข นิลียิตฺวา เต สํเวเชนฺโต ปฐมํ คาถมาห

สุสุขํ วต ชีวนฺติ เย ชนา วิฆาสาทิโน

ทิฏฺเฐว ธมฺเม ปาสํสา สมฺปราเย จ สุคฺคตีติ ฯ

ตตฺถ วิฆาสาทิโนติ ภุตฺตาติเรกํ ภุญฺชนฺเต สนฺธายาห ฯ ทิฏฺเฐว ธมฺเมติ เย เอวรูปา เต ทิฏฺเฐว ธมฺเม ปาสํสา สมฺปราเย จ เตสํ สุคติ โหติ ฯ สคฺเค อุปปชฺชนฺตีติ อธิปฺปาเยน วทติ ฯ

อถ เตสุ เอโก ตสฺส วจนํ สุตฺวา อวเสเส อามนฺเตตฺวา ทุติยํ คาถมาห

สุกสฺส ภาสมานสฺส น นิสาเมถ ปณฺฑิตา

อิทํ สุณาถ โสทริยา อมฺเหวายํ ปสํสตีติ ฯ

ตตฺถ ภาสมานสฺสาติ มานุสิกาย วาจาย ภณนฺตสฺส ฯ น นิสาเมถาติ น สุณาถ ฯ อิทํ สุณาถาติ อิทมสฺส วจนํ สุณาถ ฯ โสทริยาติ สมาเน อุทเร วุฑฺฒภาเวน โส เต อาลปนฺโต อาห ฯ

อถ เต ปฏิกฺขิปนฺโต สุโก ตติยํ คาถมาห

นาหํ ตุมฺเห ปสํสามิ กุณปาทา สุณาถ เม

อุจฺฉิฏฺฐโภชิโน ตุมฺเห น ตุมฺเห วิฆาสาทิโนติ ฯ

ตตฺถ กุณปาทาติ กุณปขาทกาติ เต อาลปติ ฯ

เต ตสฺส วจนํ สุตฺวา สพฺเพปิ จตุตฺถํ คาถมาหํสุ

สตฺตวสฺสา ปพฺพชิตา มชฺฌรญฺเญ สิขิณฺฑิโน

วิฆาเสเนว ยาเปนฺตา มยํ เจ โภโต คารยฺหา

เก นุ โภโต ปสํสิตาติ ฯ

ตตฺถ สิขิณฺฑิโนติ จูฬาย สมนฺนาคตา ฯ วิฆาเสเนวาติ เอตฺตกํ กาลํ สตฺต วสฺสานิ สีหพฺยคฺฆวิฆาเสเนว ยาเปนฺตา ยทิ โภโต คารยฺหา อถ เก นุ โภโต ปสํเสยฺยาติ ฯ

เต ลชฺชาเปนฺโต มหาสตฺโต ปญฺจมํ คาถมาห

ตุมฺเห สีหานํ พฺยคฺฆานํ พาลานญฺจาวสิฏฺฐกํ

อุจฺฉิฏฺเฐเนว ยาเปนฺตา มญฺญิมฺหา วิฆาสาทิโนติ ฯ

ตตฺถ พาลานญฺจาวสิฏฺฐกนฺติ เสสพาลมิคานญฺจ อวสิฏฺฐกํ อุจฺฉิฏฺฐโภชนํ ฯ

ตํ สุตฺวา ตาปสา สเจ มยํ น วิฆาสาทา อถ เก จ ครหิ เก วิฆาสาทาติ ฯ อถ เตสํ โส ตมตฺถํ อาจิกฺขนฺโต ฉฏฺฐํ คาถมาห

เย พฺราหฺมณสฺส สมณสฺส อญฺญสฺส จ วณิพฺพิโน

ทตฺวาวเสสํ ภุญฺชนฺติ เต ชนา วิฆาสาทิโนติ ฯ

ตตฺถ วณิพฺพิโนติ ตํ ตํ ภณฺฑํ ยาจนกสฺส ฯ

เอวํ เต ลชฺชาเปตฺวา มหาสตฺโต สกฏฺฐานเมว คโต ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา เต สตฺต ภาตโร อิเม เกฬิสีลกา ภิกฺขู อเหสุํ สกฺโก ปน อหเมวาติ ฯ

วิฆาสาทชาตกํ อฏฺฐมํ ฯ