๕. ภิสทายกเถราปทาน (๖๕)

|67.29| Vessabhū nāma nāmena isīnaṃ tatiyo ahu kānanaṃ vanamoggayha vihāsi purisuttamo. @Footnote: 1 Po. Ma. senasavhayo. Yu. yenasavhayo. 2 Ma. sugatiṃ sukhasampattiṃ. |67.30| Bhisamūḷālaṃ gaṇhitvā agamiṃ buddhasantike tañca buddhassa adāsiṃ pasanno sehi pāṇihi. |67.31| Karena ca parāmaṭṭho vessabhū varabuddhinā sukhāhaṃ nābhijānāmi samantena kututtariṃ. |67.32| Carimo vattate mayhaṃ bhavā sabbe samūhatā nāgova bandhanaṃ chetvā viharāmi anāsavo 1- . |67.33| Ekattiṃse ito kappe yaṃ kammamakariṃ tadā duggatiṃ nābhijānāmi bhisadānassidaṃ phalaṃ. |67.34| Samodhānā ca rājāno soḷasa manujādhipā kappamhi terase 2- āsuṃ cakkavattī mahabbalā. |67.35| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā bhisadāyako thero imā gāthāyo abhāsitthāti. Bhisadāyakattherassa apadānaṃ samattaṃ.