๒. อุจฉุวิมาน

|30.280| 2 Obhāsayitvā paṭhaviṃ sadevakaṃ atirocasi candimasuriyā viya siriyā ca vaṇṇena yasena tejasā brahmāva devi tidase sahindake |30.281| pucchāmi taṃ uppalamāladhārini āveḷini kañcanasannibhattace alaṅkate uttamavatthadhārini kā tvaṃ subhe devate vandase mamaṃ |30.282| kiṃ tvaṃ pure kammaṃ akāsi attanā manussabhūtā purimāya jātiyā dānaṃ suciṇṇaṃ atha sīlasaññamaṃ Kenūpapannā sugatiṃ yasassinī devate pucchitācikkha kissa kammassidaṃ phalanti. |30.283| Idāni bhante imameva gāmaṃ piṇḍāya amhākaṃ gharaṃ upāgami tato te ucchussa adāsiṃ khaṇḍikaṃ pasannacittā atulāya pītiyā |30.284| sassū ca pacchā anuyuñjate mamaṃ kahannu ucchuṃ vadhuke avākari na chaḍḍitaṃ na ca khāditaṃ mayā santassa bhikkhussa sayaṃ adāsihaṃ |30.285| tuyhaṃ idaṃ issariyaṃ atho mamaṃ itissā sassu paribhāsate mamaṃ pīṭhaṃ gahetvā pahāraṃ adāsi me tato cutā kālakatamhi devatā |30.286| tadeva kammaṃ kusalaṃ kataṃ mayā sukhañca kammaṃ anubhomi attanā devehi saddhiṃ paricāriyāmahaṃ modāmahaṃ kāmaguṇehi pañcahi |30.287| tadeva kammaṃ kusalaṃ kataṃ mayā sukhañca kammaṃ anubhomi attanā Devindaguttā tidasehi rakkhitā samappitā kāmaguṇehi pañcahi |30.288| etādisaṃ puññaphalaṃ anappakaṃ mahāvipākā mama ucchudakkhiṇā devehi saddhiṃ paricāriyāmahaṃ modāmahaṃ kāmaguṇehi pañcahi |30.289| etādisaṃ puññaphalaṃ anappakaṃ mahājutikā mama ucchudakkhiṇā devindaguttā tidasehi rakkhitā sahassanettoriva nandane vane |30.290| tuvañca bhante anukampakaṃ viduṃ upecca vandiṃ kusalañca pucchiyā tato te ucchussa adāsiṃ khaṇḍikaṃ pasannacittā atulāya pītiyāti. Ucchuvimānaṃ dutiyaṃ.